|目錄|
001 金快也跳運河
071 石平貴、王寶川
201 百花肖褒歌
|書序|
縣長序
陳唐山
台語可以是一種語言,也可以是一種文學,在我們日常生活中,有太多從台語中所淬煉出來的雋語、歌詩、童謠、褒歌等等,代代相傳,形成生活中最生動的片語與最美麗的智慧。
長期以來,台語只是一種語言,並未形成一種文學,坊間雖然出現過若干的「民間文學」,但多未經過系統整理與詮釋,充其量只是隨興式的拼湊編印而已,就文學角度觀之,實在不易看出它的功能與地位,殊為可惜。
這些年來,台語文研究風氣,風起雲湧,百家爭鳴,民間文學形成一股風潮,並成為顯學。唐山自接任縣長之後,特別重視本土文學的推動,以強化本土藝術,愛惜斯土斯民。難得的是,台南縣文化局在葉局長的領軍之下,開官方風氣之先,於民國八十四年首度推出《南瀛台語文學叢書》一套六冊,將台語文學系統化、學術化,並予以重新詮釋與定位,使台語文學不只在這塊土地上生根,同時也推向國際文壇,一時廣受好評,許多大學、研究機構紛紛接上國際網路。
此次,再接再厲再度出版也是一套六冊的《南瀛台灣民間文學叢書》,整理台灣民間說唱七字仔歌仔簿,稽考文字,以全新面貌出現,為台語文運動再助一臂之力,使台語民間文學更上層樓,更接近廣大人民。讓更多人瞭解台語可以是通俗的,也可以是精緻的;可以是鄉土的,也可以是國際的。
值此《南瀛台灣民間文學叢書》十二冊問世之際,除對縣立文化局葉局長與全體同仁的努力,肯定之外,同時也要對編者黃勁連的辛勞,表示感謝之意;台語民間文學的園地有這麼多人在一起耕耘,將來一定會五穀豐收,六畜興旺。
局長序
葉佳雄
有井水、有儂煙兮所在,有儂咧唸詩、唱歌;有儂兮所在,有文學。這是誠自然兮代誌,那親像鳥仔佇樹枝頂,自然咧啼叫;草仔佇土地頂面,自然咧生長、生枝發葉。台語是一種古意、古典又佫幼秀兮文學語言;咱兮祖先,四百冬前著用台語兮前身──閩南語咧思考來唱歌、唸詩;不管作穡抑做工,唸褒歌來娛樂家己亦娛樂別儂。四百冬前,咱泉州兮老祖先著已經開始咧演劇搬戲,同時創造出「陳三五娘」南戲兮戲文;建立了台灣民間文學兮傳統基礎。
台語兮古典文學,一脈相承,源遠流長;唯南戲戲文、南管兮散曲,夠北管兮文學,民間男女對唱兮七字仔褒歌,夠歌仔戲戲文,布袋戲、皮影戲戲文,超過壹仟三佰本兮歌仔簿,無法度計數兮民歌民謠,囡仔歌、囡仔古......會使講是山重水複,一山懸過一山;多采多姿,處處是柳暗花明兮好風景。這是台灣文學兮財產,唔是負債;做一位台灣作家應當愛來繼承、吸收,蓮花化身共伊發揚光大。
民間文學兮特色著是口頭文學;台灣兮民間文學嘛是安爾:伊兮作者唔是有名有姓兮作家、詩人,是唔知姓名兮廣大人民逐家合力共同創作兮。伊口耳相傳、活佇廣大人民兮喙裡;在有情兮人間,在咱兮土地流浪,行過人間兮悲喜。後來經過文人兮採集、研究、稽考、修訂,共伊「文字化」;然後登佇報章雜誌,印佇冊裡;慢慢仔定型,繼續佇曠濶兮民間流行。那親像野草咧,充滿頑強野生兮力量;野火燒不盡,春風吹又生。
台灣民間文學兮特色,是建立佇台灣語言兮特殊性格;是古意、古典、文雅,是樸素、簡潔、自然、生動;是語彙兮丰富,以及可歌可唸,伊充沛兮音樂性;抑揚頓挫,那親像「大珠小珠落玉盤」。佫來著是意象性、伊形象化兮語言,營造多采多姿兮文學風景,來描寫台灣特殊兮風土人情;伊兮思想性,伊簡潔有力兮語言佇樸素兮文學形式裡,表露台灣儂兮人生觀,人生兮哲學,對大自然兮觀照,佮對人類社會兮批評。
自古以來咱兮文人作家高高在上、看勿會起咱兮民間文學;一般士大夫、讀冊儂嘛看勿會起咱兮民間文學。亻因認定奚是販夫走卒、引車賣漿之徒兮雜唸亂唱兮文學,不登大雅之堂;真是互儂感覺遺憾。一九三六年李献璋出版“台灣民間文學集”,台灣新文學之父賴和先佇頭前兮序文安爾講:「被士大夫排斥兮民間故事、歌謠,夠現在,猶會當在百姓喙裡咧流傳、唸唱;即款性命力兮拍畚,咱是唔敢看輕、凊彩共伊放過。啥乜原因咧,因為每一个故事抑歌謠,攏會當表現當時兮民情、風俗、政治、社會制度,亦會當表示當時民眾兮真實兮思想、感情;所以無論唯民俗學、文學,甚至唯語言學上看來,攏有伊保存兮價值。」早早著發出伊無奈兮感嘆,以及伊先知迄款獨到、利劍劍兮見解,互儂興奮,精神百倍,想卜振作起來追隨前輩兮跤步,繼續拍拚;關懷咱兮民間文學,更上一層樓,共咱兮民間文學,廣泛兮搜集、整理、研究;進一步共伊系統化、精緻化。同時用台語羅馬字共伊注音,用台語來共伊注解;希望咱兮民間文學會當普及化,重新行回民間,互咱兮民間逐家佫來喜愛。今旦日,咱「台南縣文化局」投入無法度計算兮時間、精力、財力,重新整理、編印《南瀛台灣民間文學》一套十二本著是即款兮心意。佇遮,我卜代表「文化局」來向黃勁連、不眠不休兮努力,表示敬佩、感謝之意。即款幼秀兮台灣民間文學兮系統化出版,希望那像海湧咧;一湧接一湧,接紲來出版。
編者序
黃勁連
台灣兮民間文學,實際上著是台灣文學,亦著是用台語來思考,描寫台灣兮人、事、物,記錄台灣兮風土、民情,表現台灣儂兮生活經驗,思想、感情兮世界兮文學。唯台語兮民間文學,咱會當看?台灣儂兮歡喜抑是悲哀;咱會當偷偷仔看著台灣儂兮形象佮伊心內兮夢。
台語是文學性、音樂性兮語言,伊有八音七調,九个變調,伊古老、古典、古意,又佫是進步,反映時代兮現代性語言,伊會當形成意象,創造文學兮風氣;咱兮祖先自早著用父母話,來咧思考、創造兮文學。佇西元1566年,明朝嘉靖年間咱兮老祖先著已經創造南戲戲文《荔鏡記》兮劇本,搬演陳三五娘兮愛情故事;伊兮文學性誠懸,無輸三伯英台兮戲劇。唯西元1566年兮《荔鏡記》算起,夠北管兮文學、男女對唱兮七字仔褒歌、歌仔戲戲文、布袋戲戲文、皮影戲戲文、一仟三百外種兮歌仔簿,以及數目非常可觀兮民歌民謠、囡仔歌、囡仔古......。咱兮台語民間文學歷史超過四百冬,四百外冬兮民間文學會使講是源遠流長,波浪壯濶,一湧懸過一湧,非常兮澎湃,非常兮壯觀,值得來共伊吸收、繼承,發揚光大。
台語兮民間文學是台灣現代文學兮肥底,南戲戲文、歌仔簿是台灣戲劇、小說兮源頭;男女對唱兮七字仔褒歌是台灣歌詩、現代詩兮水源。今旦日台灣儂兮意識舉頭,台灣兮詩人、作家一夜之間雄雄睏精神;逐家有疼心、有愛心、有毅力、有決心卜來愛鄉愛土,創造真正原汁兮台灣文學;寫出有台灣水質、台灣塗味,有台灣主體性,有血、有目屎兮文學;咱愛來食遮源頭兮活水,吸收遮兮營養分來壯大家己。咱一定愛回歸鄉土,轉來祖先兮田園種作現在文學兮新品種,咱兮台灣文學則有向望。
台南縣立文化局,拔著頭彩,已經出版台灣第一套兮台語現代文學叢書,風起雲湧帶動台灣本土化兮熱潮;現在飲水思源,食果籽拜樹頭,佫卜來出版台灣兮民間文學:七字仔史詩─歌仔簿六本。互儂非常歡喜。杜甫兮詩:「不薄古人愛今人」講咧真好。咱文化局兮做法著是不薄古人愛今人兮充分表現;尊重現代亦疼惜古典,佇遮編者唯心肝底表示敬意佮感謝。即套冊兮出版是不朽兮「盛事」,希望對「台灣文藝兮復興」,有一定兮幫贈。
金快也跳運河本事
陳永派
故事兮主角叫陳金環,厝徛海墘,自細漢無父,厝又散赤,佇十三歲迄冬,因為老母來過身,身邊又無親無戚,無依無倚,只好賣身葬母,以叁佰箍賣互台南市萬泰餅店去做查某,入門後改名金快也。
金快也佇餅店是粗兼幼,透早無閒夠半暝,有時佫互頭家娘─桂英也來摃、拍。有一日金快也卜上街買螺肉罐頭,卻佇仔店內失落迄五箍銀,佇哭啼中由路過兮吳開利先生幫助,渡過一次大危機。
苦苦度過兩冬,金快也已是婷婷玉立兮水查某囡仔。即時頭家娘─桂英也,想夠「女大不重留」,便動起歪念。將金快也來賣互酒家─萬家樓。(舊址佇西區康樂街)
金快也佇萬花樓已是十六歲了,先是學琴、唱歌、賣面無賣身。琴、歌、身材面貌都真受儂客歡迎,宛然一个大腳數。老蔥頭─紅綢也也開始動金快也兮頭殼啦。逼金快也來接客。
佇進退兩難之時,大恩人吳開利出現來解圍,答應卜替伊贖身,真不幸,吳先生忽然走水經商失敗,經濟發生困難,又佫犯法恐有牢獄之災,無法達成解救金快也兮願望。
佇兩儂進無步、退無路兮苦境中,兩儂參詳既然生來勿會當做伙,死著愛做堆做為結局,便肖夠運河墘,互相縛做伙來殉情。
(兩儂跳運河兮地點是佇烏橋仔─木造橋,橋板塗擦烏色兮打馬膠油,所以號做烏橋仔,已改建為鋼筋水泥橋,現址為西區府前路兩段,改建後號做新南橋。)
隔日早起兩儂死體浮出水面,流夠運河北街佮環河街轉角,今中國城後面,經漁夫發現了后報警葫出,轟動府城是台南運河第一件兮跳運河案。
男主角吳開利,西區普濟殿境儂,邀有兩男;其中大囝已經過身,二囝佇台北經商,伊原配夫人,猶原健在,滯佇本市永福路某巷內。
金快也跳運河(節錄)
總請列位緊來聽 即部歌詩大時行 民間故事是有影 改勸老輩青年兄
臺南運河兮奇案 開利金快迄一層 環境壓迫真怨嘆 同心同意離世間
世間有天佮有地 女大當嫁男配妻 世上愛情大關係 第一相好亻因兩个
二十年前兮故事 即部唔是有古書 流傳社會是真久 站節做去真工夫
恰早日本兮時代 則會流傳當今來 序大若是有慷慨 青年男女勿會悲哀
社會做儂愛覺悟 唔通損失儂前途 助成男女做翁某 恰贏趁著規千租
世上著做好模範 好歹也會夆流傳 逐家唔通學即款 萬事了解無悲怨
汝咱移民兮後代 古早傳統當今來 臺灣風俗是無改 鑼鼓不時鬧猜猜
農曆正月十五暗 就是古城兮臺南 有迎花燈真長站 大炮炮煙烏黔黔
也有矮儂韓丹爺 藝閣有粧李哪吒 伊鬧東海火輪徛 金圈金鎗雙手舉
一款弄龍佮弄獅 獅龍陣頭緊迎來 受著環境來阻害 著是三伯佮英台
有粧三娘咧擔水 公鞅婆仔蓋古錐 另外一閣雙跤跪 包公跪咧請五雷
也有一陣小老爹 涼傘紙糊雙手舉 一个牽馬頭前徛 紙馬跑去真正邪
一陣昭君去和番 翁某分開勿會雙全 奸臣陷害真唔願 財散儂亡勿會團圓
一出雪梅訓商輅 唔聽教示氣規晡 甘願守節忍艱苦 商輅進中有功勞
鬧熱一陣過一陣 看甲逐家鬧紛紛 陣頭迎透總歇困 海邊水清天無雲
海墘草茅燈火光 一條古早舊眠床 散赤家庭無摒盪 一个老儂困中央
一領蠓罩破裂裂 勿會輸和尚兮袈裟 一个囡仔佇內底 內面干礁亻因兩个
即个少女十三歲 海墘徛起散赤家 奉待亻因母身邊坐 第一可憐亻因兩个
對亻因老母真有孝 細漢有孝是真敖 亻因母病重唔敢吼 每日煩惱頭鈎鈎
金快煩惱無儂知 母死葬費對哪來 自恨運命那迹䆀 隨在天地去摧排
金快聽見母咧叫 母親身體真礙虐 散赤錢項無哪借 也是無錢通拆藥
無錢實在可憐代 雙手捧茶面來 母親起來啉看覓 唔免怨嘆想東西
囝汝唔通流目屎 恁母勿會好通起來 恁爹面前咧等待 死了簡單共我埋
阿母唔通安爾講 醫生講汝命勿會亡 卜來共咱認真創 身體漸漸會健康
這是醫生咧安慰 恁母若死囝喫虧 即陣強強卜斷喟 死了啥儂通營為
金快汝著斟酌聽 大概即陣敢著行 若是三長四短命 勿會得葬身揣官廳
請汝阿母愛養靜 明日佫再倩醫生 病體唔通急心性 刺激精神病勿會輕
看見母親佇咧吼 佫再捧茶乎潤喉 自怨爹親早年老 一擔則來申一頭
金快看著母面容 心內就咧暗悲傷 穩當會死是勿會勇 死了卜合啥參詳
萬一老母若是死 變成天涯兮孤兒 怎樣生活會得去 現時厝內無半系
怨嘆歹命目屎垂 看著母親咧安睡 行夠窗邊喘大喟 十三歲著迹喫虧
那哭那咧拭目屎 寒風陣陣吹入內 天地怎樣來拍派 互我歹命真不該
聽見鑼鼓炮仔聲 鬧熱唔知怎樣迎 自恨咱是歹命囝 勿會得綴儂去府城
金快倚在窗仔前 有看儂舉元宵燈 世間合儂無比並 爹死無儂通牽成
想見舊年元宵夜 母親咧講阮阿爹 在生合儂有坐徛 也買兔燈互我舉