│內容簡介│

出身臺南的王育德，雖自年輕時流亡海外，

無法再回到心愛的故鄉臺灣，

但他將對臺灣的愛投注在臺灣語言研究，

成為第一位臺語博士，

並留下許多臺語研究及臺灣史的著作。

期待「語言是民族的靈魂」的真諦能被實現，

讓更多人共同認識、傳承臺灣的語言、歷史及文化。

│推薦文│

上佮意ê代誌

文／王明理

（王育德次女．臺灣獨立國聯盟日本本部委員長．日本詩人俱樂部會員）

臺文譯者／周華斌

    各位少年朋友檢采猶無實際感受，人tō算講大漢，細漢時佮意ê代誌嘛會一直佮意。我是這本冊ê主角王育德ê查某囝，我知影ê阿爸佮意ê代誌，源頭全部攏是伊佇臺南ê囡仔時代。

    饞食ê阿爸，大學教課若煞，轉來ê半中途，有當時仔會買1橐魚丸，等袂到厝tō uān-nā食uān-nā轉來。包肉粽、灌煙腸ê材料，東京普通ê店無咧賣，阿爸真歡喜到Yokohama誠遠ê城市去買。伊嘛佮意參人tshit-thô，伊hia--ê兄哥教伊ê將棋、圍棋，伊有繼續耍，閣提著級數。聽講往過佇臺南厝裡ê2樓陽臺，有囥phn-phóng桌，遐有in兄弟做伙tshit-thôê記持。我細漢時，阿爸嘛捌tshuā我去phn-phóng場教我拍phn-phóng。

    佮意ê人kā咱講ê話，嘛會留佇咱心肝底。聽講，阿爸細漢時，上佮意ê兄哥育霖kā伊講：「咱若大漢，愛成做對社會有路用ê人！按呢，咱tō愛拍拚讀冊。」阿爸照約束行，大漢了後嘛逐工攏會坐佇冊桌仔頭前，想欲用筆ê力量完成家己ê使命。

    若講著阿爸上佮意--ê，正正tō是家己ê故鄉，臺灣。伊向望臺灣人會當使用家己ê語言，幸福過日。伊嘛為著按呢，一直拍拚。

    向望各位會使趁少年體驗濟濟代誌，有佮意ê代誌，tō一直相紲落去。若按呢，檢采tō會為各位ê人生加添色彩！

對阿公王育德ê記持

文／近藤綾

 (《旅行用臺灣話》作者，臺語、臺灣原住民研究者)

    阿公tsiânn疼--我，我毋捌hōo伊罵kuè。若去揣伊tshit-thôê時，伊lóng會tshuân我愛食ê栗子hōo--我。而且伊逐擺lóng會講：「敢有？我想無逐擺lóng有喔！啊！揣--著--ah！」按呢搬一齣小戲，kā阮弄甲笑咍咍。

    閣有，阿公kā我kap阮小弟ê手牽leh，行去附近êkám-á店，買樹奶糖ih-sī糖仔hōo--阮，阮tsiânn歡喜。不管阮揀啥，伊lóng bē嫌，干焦講：「好--lah，好-- lah！」就買hōo阮ah。

    阿公過身ê時，我真傷心，háu甲tsiânn悽慘。會記得彼陣，阿公ê面siunn-kuè媠，親像猶閣活leh kāng-khuán，想講燒掉bô-tshái，我大聲háu講，mài --lah，mài--lah！對我來講，阿公是我tsiok要緊ê人。

    阿公過身了後，伊ê冊培養我ê臺灣意識。尤其是《臺灣——苦悶的歷史》ê印象tsiânn深，幫助我了解這層代誌：臺灣就是臺灣，一个獨立ê國家。為著這層，雖然我人lóng蹛tī東京，m-koh我一直感覺，「我ê一半，猶是臺灣人」。

    成做大學生了後，我開始用《臺灣話入門》、《臺灣話初級》來學臺語。會曉講臺語了後，我ê臺灣意識lú來lú強，會使講有「臺灣是我另外一个母國」ê感覺。親像阿公所講ê，「語言sī民族ê靈魂」，確實kap意識有tsin深ê連結。

    這擺會當用臺語來出版阿公ê尪仔冊，我感覺非常歡喜。希望這本冊會當hōo真濟囡仔讀著。多謝！

予咱ê少年囡仔讀一个屬tī家己、予家己勇氣ê故事

文／呂美親

(臺灣師範大學臺灣語文學系助理教授)

    全世界攏著災ê2020年，考驗人ê身軀kap心靈、考驗國家ê意義，mā考驗全球化ê界限。看袂著ê災厄tauh-tauh會過去；毋過，看會著ê壓迫，逐不時tī每一个所在teh發生，無管你ê肉色、民族iah國家，是啥物款式。

    我tī日本留學ê上尾第二冬，受著臺南文化局ê委託，編譯《漂泊的民族——王育德選集》（2017出版）。因為按呢，有機會khah深入認捌王育德先生這位一世人攏teh反抗強權、mā替臺灣人爭取濟濟「人權」ê賢者。人權ê意義有真濟層次，親像是講母語ê權利、用母語書寫文章ê權利、獨立思考ê權利；成做一个集體，有認捌家己歷史ê權利、自由表達意見ê權利、追求民主ê權利；iah若面對強勢者ê非情對待，弱勢者mā有爭取平等權益ê權利。

    雖罔逐時代有逐時代ê困境，面對無仝款ê災厄kah逆勢，欲按怎超脫、克服，著靠彼時代ê人所展現ê智慧kah儼硬。Tī這个強權kap壓迫iáu原在ê時代，相信王育德先生所做ê濟濟事工，kap伊所替咱示範成做一个「人」ê形勢，iáu是予咱得著真濟啟示、勇氣kap力量。

    一本繪本會當講ê故事有限，總--是，畫內面有真濟線索，通予咱來認捌這位自少年就離開臺灣、毋過規世人攏teh為著故鄉臺灣揣出路ê人。Iah王育德siōng予人知影ê就是伊tī研究臺灣話ê成就，所以，成做這本繪本ê臺文譯者，我一方面感覺真榮幸，閣較希望ê是有愈濟人因為讀著臺文版，m-nā對咱ê母語有閣較濟ê疼惜，也會當kā所得著ê勇氣化做力量，繼續替母語爭取權利。