臺南市政府文化局出版品資訊網 -- 臺江臺語文學季刊第34期:福爾摩沙的風景
正在加載......


售價 : $200
 臺江臺語文學季刊第34期:福爾摩沙的風景
 
  發行人:葉澤山
  總編輯:陳建成
  出版:臺南市政府文化局、財團法人臺南市文化基金會
  出版日期:民國109年5月5日
  ISSN:2227-748-X
  GPN:2010100888
  語言:繁體中文、臺語
  規格:平裝/23*17.3cm/253頁
  定價:NT$200元
 
 
 
 
|目錄|

 

001  書名頁

005  非常時期,齊心守護臺灣!/編輯部

 

008  福爾摩沙的風景 / 詩歌年年傳唱──二二八詩歌文化節/羅山

010  目睭內ê基隆杙/鄭如絜

012  落水上媠──水雉(菱角鳥)/文/黃徙  攝影/簡瓔汝

014  台南兮日子/葉東泰

016  泅過愛河月光/王希成

018  八里/田美瑜

022  林初埤的斑芝佇春天寫詩/吳嘉芬

023  太魯閣國家公園見學之旅/程鉄翼

033  三月鼓吹/林榮淑

044  「水薸塭仔」的相思/陳雅菁

046  關原雲海/賴朝和

052  旅行明信片/吳正任

061  《海島歌聲》慢府城/林裘

 

城市的情韻

062  《臺灣男子簡阿淘》進軍東瀛!──葉石濤日文版新冊發表/採訪報導/邱志勤

066  父の帰郷──畳の跡/原作:王明理  台譯:周華斌

072  期待明仔載的人──王育霖/陳正雄

 

為愛導讀

083  自由ê滋味是hiah爾仔甘甜/Khóo Sè-lâm

090  踅冊店/郭文玄

 

現代詩

100  失落的批信/曾美滿

104  三月ê旅遊史/李勤岸

109  茉里詩草5首/胡民祥

114  美國西裝/黃勁連

116  擠膿/蔡秀英

118  打狗踏查──記高雄雄中二二八陳仁悲訪談/杜信龍

121  流浪的青春/力麗珍

122  有關時間/古能豪

124  神祕的西北派/林天送

126  予時間通緝/凍露水

128  咱是母親/蘇善

129  影像/李淑貞

130  孤獨/呂曉燕

131  美地/高月員

132  毋捌聽過妳問/沙山若懷

 

散文•小說

134  吳哥的舞者/王耀東

143  豆菜佮破卵/謝慈愛

146  走標路/陳金順

154  走揣/林美麗

176  陸光診所/黃文俊

198  黃昏ê古亭町/呂美親

 

評•論

223  日治時期台語文「言文一致」ê內涵(上)/周華斌

234  未成的南國──略講《南國囡仔》出版進前/林益彰

 

臺譯文章

238  林宗義ê故事(四)──化悲情為大愛ê人生路/◎華語原著:曹永洋 台語翻譯:林俊育

 

講到太平洋

247  狗兄弟學台語佮畫圖(三)/詩/康原  繪圖/一念

 

《台灣俚語小學堂》

250  膨風水雞刣無肉/阿昆

251  牛就是牛,牽到北京也是牛/阿昆

 

252  徵稿啟事

254  版權頁

256  專題徵文

 
 
|書序|

 

編輯手記

 

非常時期,齊心守護臺灣!

 

編輯部

 

        「武漢肺炎」排山倒海的疫情無疑是全球上重大的災厄佮焦點,截到今年四月三號為止,自2019年底首例佇中國武漢市爆發開始,病毒快速佇世界各地傳染生湠,已經波及203个國家,確診的個案超過100萬名,造成超過5萬名的患者死亡,這个數字閣無包括因為國家醫療資源欠缺,或者政治考量蓄意隱瞞等種種因素無統計公開列出的「烏數」。總共有接近40億人口受著鎖國、封城佮禁止出門的制約,對全世界的交通運輸、觀光旅遊、經濟貿易、大眾的生活工作…等各方面已經造成空前的重大影響,連當今上強盛的歐美先進國家,嘛陷入疫情節節高升,醫療體系崩盤的的困境。

        這場疫災,目前猶是進行式,親像拍開「潘朵拉的盒仔」觸動恐惶的連鎖反應,世界各地相紲一个接一个封城,一波接一波鎖國,無法度預測未來會發展到啥物地步,會造成偌大的傷害。佇現此時已經呈現出來的種種亂象當中,有真濟方面攏會當促引咱深思矣!看會著的,人類稱霸地球,開山填海,源源不絕發明出強大的武器裝備,面對微末甲肉眼看袂著的病毒卻是猶原脆弱無助,對欲望權力的執迷,遠遠超越對自然、性命的珍惜佮維護;看會著的,命運八字恐驚真正落塗註定,生佇民主國家佮共產國家有完全無仝的比重,特別是佇醫療欠缺的所在,輕茫茫隨風飄搖;看會著的,佇疫災中所流露形形色色的人性、民族性,包括衍生出來的奇奇怪怪無理性的應對,包括大大力撼動近代全球化發展了後,人類跨越國界所形成新的性命共同體的依存連動。

        甚至,若將視線徙離人群城市,徙離螢幕上使人齷齪(ak-tsak焦躁)的政治把戲──佇逐家共同承受重大苦難當中,彼个一開始就隱瞞疫情的國家猶派軍機咧威嚇臺灣企圖轉移焦點,猶咧操作病毒來源推卸責任,反變( píng-pìnn 「武漢肺炎」、「新冠病毒」、「COVID-19」等背後的意涵,舞弄政治的鋩鋩角角(mê-mê-kak-kak),攑頭看衛星空翕(hip)的圖像,會發覺病毒無鋩無角,已經恬恬佇地圖做號──連帶阻遏世界工場無節制的工業汙染、環境破害,還予地球一片清氣的色水。

 

感謝全國的防疫人員

        這場疫災,雖然災情慘澹,使人驚惶憂心,毋過嘛予身為臺灣人的咱顯露出值得驕傲的所在。基於過去對抗SARS的慘烈經驗,佮對中國這个國家的深刻了解,臺灣當局佮醫界一開始就真猛醒提早戒備,抱持謹慎務實的態度建立重重的防疫機制,並且因應疫情的進展跨部會整合調度、超前部署防範於未然,這幾個月來的防疫工課佮成果,已經成做全球的典範矣!

        佇遮,咱感謝全國所有投入防疫的人員,恁勇敢辛苦的付出,佇WHO(世界衛生組織)之外自強自立,為臺灣徛佇第一線將武漢肺炎的風暴控制到上低的傷害,展現出一流的防疫效率佮醫療素質,普遍得著民眾的肯定佮世界各國的呵咾(o-ló),毋但為咱大大加添一份尊嚴佮自信,相信佇這段全民鬥陣對抗病毒的過程,嘛激發出臺灣各界空前的團結,予做「正確的代誌」佮支持「大是大非」的理念形成高度共識,取代過去時常使國家空轉內耗的「藍綠對立」的意識形態,對臺灣未來的發展,嘛大大踏出正面的一步。

 

咱齊心防疫!

        逐家感受會著的,疫情猶原非常嚴峻,病毒一直咧進化,變化無常,尤其是現階段世界各地確診的人數快速增加,境外移入的風險步步進逼,任何疏失攏可能造成嚴重的後果。因此,佇遮佮逐家互相勉勵,非常時期,防疫是當下切身的要務,毋通失去警覺放鬆去,無論如何一定愛繼續努力堅持,齊心守護臺灣,為咱家己,更為咱所愛所關心的人。


 
|內容試閱|

 

踅冊店(節錄)

 

◎郭文玄

 

        201211月初7欲暗仔,對捷運東門站5號出口出來,遠遠,就看著「鼎泰豐」的門口,予滿滿等欲食飯的人客佮觀光客圍牢咧。我行向「鼎泰豐」,串過人群,入去隔壁的「金石堂」。柔美輕鬆的音樂,恬靜的氣氛內底,引我也放鬆浸咧悠遊隨性的內在,隨意踅到詩詞專櫃買3冊現代詩集周夢蝶<十三朵白菊花>、陳家帶<人工夜鶯>、波蘭詩人<辛波絲卡(Wislaws Szymborska)詩集>佮朱和之台灣史散論集<滄海月明──找尋台灣歷史幽光>

 

        佇淡水讀冊時,逐禮拜基隆往返經台北踅重慶南路冊店街,定定斡過武昌街就看著周夢蝶,一如往常看冊抑靜坐,親像禪師禪定,到今猶留存伊袂輸刻石碑字體的修訂本佮簽名。

        當年舊冊擔結市的光華商場,也是我定定揣寶的所在,買著陳家帶絕版詩集< 夜奔> 結冊緣,又閣看伊出詩集而且創作力十足(2015年出版詩集<聖稜線>),予我嘛精神飽足歡喜。

        文學前輩宋澤萊佮胡長松用台語翻譯波蘭詩人「辛波絲卡」(Wislaws Szymborska)詩作,予人思考任何國家描寫親近土地的作品,若翻譯做譯者的母語,閣較妥當。

        毋捌聽過名的朱和之,非專業的台灣史研究者,5年中間恬恬走揣,行過國內外書寫的歷史現場,為著探揣台灣的身世佮自我的深度認同,2017年閣出版荷蘭人與鄭成功之間的熱蘭遮大戰的長篇歷史小說<逐鹿之海>

 

        佇咱內心,毋知影所在的低層,佇台灣,佇世界無人知的角落,就是有恬恬執著信念的行動者。世界文明的動力,國家的人文資產自按呢累積tshë底,予人類的活路有微光,寬寬仔行向前。

 

……


 


gotop